இன்றைய முதிர்கன்னிகள்

பெண்கள்
படித்தால் நீங்கும் அறியாமை என்றார்கள்
பட்டங்கள் பெற்றோம்
வேலைக்குப்போனால் விடுதலை என்றார்கள்
வளமான சம்பளம் தான்
ஆனாலும்
இன்று நாங்கள் முதிர் கன்னிகள்
அழகுக்கு இலக்கணம் சொல்லும்
பருவத்தின் வாசலில் நாங்கள்
பெற்றோர் சொல்லுக்காய்
காதலுக்கு கதவடைத்தோம்
விளைவு
இன்று நாங்கள் முதிர் கன்னிகள்
எங்களின்
சுயம்வரத்தில் வருகை தந்தனர்
மாப்பிள்ளைகள் வரமாலையோடு
மாலையிடும் உரிமை தான் மறுக்கப்பட்டது
வரமாலையுடன் வந்தவர்களை
தரம் பார்த்து தள்ளி விட்டே
மாறிப்போனது எங்கள் பருவங்களும்
எங்களின்
திறக்காத சம்பள உரைகளை
திறந்தே பழக்கப்பட்ட பெற்றோர்க்கு
மகளுக்கு பூச்சூட மனமில்லை
மனது மரத்து புத்தி விழித்துக்கொண்ட போது
கடந்து போயிருந்தது காலம்
இன்றும் நாங்கள் முதிர் கன்னிகள்