ஒரு பெண்ணின் கனவுகள்

எனக்கே சொல்வதற்கு வெட்கம் தான்

இந்த
கனவுகளுக்கும்
கற்பனைகளுக்கும்
காலம் புரியாது
புதுப்புது உலகத்தை
உருவாக்கிக்கொண்டே இருக்கிறது என்னுள்

ராஜாங்கத்தின் இளவரசியாக
அதிகாரியின் மகளாக
ஒரு நாள் குதிரையில்
ஒரு நாள் காரில்
ஒரு நாள் அரண்மனையில்
ஒரு நாள் மாளிகையில்
சேனைகளைப்பார்த்து
ஆணையிடும் நாயகியாய்

எனக்கே சொல்வதற்கு வெட்கம் தான்

ராஜகுமாரக்கனவில்
ஒரு நாள் பால் தீயும்
ஒரு நாள் சோறு குழையும்
என் கனவுகள் மட்டும் நின்றபாடில்லை

முதல் சுயம்வரத்தில் குடும்பம் பிடிக்கவில்லை
இரண்டாம் சுயம்வரத்தில் மாப்பிள்ளை சரியில்லை.
மூன்றாம் சுயம்வரத்தில் பேரம் படியவில்லை
நான்காம் சுயம்வரத்தில் என்னை யாரும் கேட்கவில்லை
நானும்
என் கனவுகளைச்சொல்லவில்லை