நினைவுக்குமிழிகள்

வாசலில் ஓடிய மழை நீரில்
பழைய காகிதம் தேடிக்கிடைக்காமல்
பள்ளி நோட்டுகளின்
பக்கங்கள் கிழித்து மிதக்கவிட்ட கப்பல்கள்.
தெருவின் முடிவில், அன்றி
தேங்குமிடங்களில் தேங்கும் குப்பைகளாய்..

உன்னுடையதா? என்னுடையதா?
போட்டிகளில் பலியாகும்,
காகிதக்கப்பலில் பயணம் செய்யும் கட்டெறும்புகள்.

பால்யகாலத்து நினைவுக்குமிழிகள்
சட்டென வெடித்து வெளிவரும்.
நீயா? நானாவென போட்டியிடும்
இடங்களில்,
யாரோ பலியாகும் தருணங்களில்.